Pse i lejon Perëndia provat?

Parathënie

Fjala “provë” do të thotë “vuajtje”, “shqetësim”, “një akt testimi apo sprovimi”. Në Bibël, gjenden katër fjalë të ndryshme, që po të përkthehen nga greqishtja, do të thonë “provë”. Njëra prej tyre, greq. “purosis” do të thotë rafinim, ose testim me anë të zjarrit. “Shumë të dashur, mos ju duket çudi për provën e zjarrit që u bë ndër ju për t’ju provuar, se si ju ndodhi diçka e jashtëzakonshme. Por gëzohuni, duke qenë pjestarë të mundimeve të Krishtit, që edhe në zbulesën e lavdisë së tij të mund të gëzoheni dhe të ngazëlloheni. Në qoftë se ju fyejnë për emrin e Krishtit, lum ju, sepse Fryma e lavdisë dhe Fryma e Perëndisë prehet mbi ju; nga ana e tyre ai blasfemohet, kurse nga ana juaj ai përlëvdohet” (1 Pjetrit 4:12-14).

Qëllimi i provave

 Shpesh Perëndia lejon që të përjetojmë vështirësi, me qëllim që të na provojë besimin tonë. Provat dhe përndjekjet e ndryshme, që vënë në provë besimin, zbulojnë nëse i besojmë apo jo vërtet Perëndisë. “Për këtë gëzohuni, ndonëse, në qoftë se duhet, për pak kohë, tani duhet të trishtoheni nga prova të ndryshme, që prova e besimit tuaj, që është shumë më i çmuar nga ari që prishet, edhe pse provohet me zjarr, të dalë për lëvdim, nder e lavdi në zbulesën e Jezu Krishtit” (1 Pjetrit 1:6-7). Ari duhet të kalojë përmes provës së zjarrit, me qëllim që elementet e tjera tokësore që gjenden në të, të ndahen prej tij. Është vullneti i Perëndisë që edhe ne të kalojmë përmes provës së zjarrit e të dalim plot me besim, i cili është më i çmuar se ari. Kështu mund të paraqitemi para Krishtit si një popull i pastruar e i shenjtë. “Që ta nxjerrë atë përpara vetes të lavdishme, pa njolla a rrudha a ndonjë gjë të tillë, por që të jetë e shenjtë dhe e paqortueshme” (Efesianëve 5:27).

Provat prodhojnë përulësi dhe durim brenda nesh, edhe pse ndoshta në kohën e provës, ne mund të mos jemi në dijeni të këtij fakti. “Dhe, që të mos më rritet mendja për shkak të jashtëzakonshmërisë së zbulesave, m’u dha një gjëmb në mish, një engjëll i Satanit, për të më rënë me grushta, që të mos mbahem me të madh… Prandaj unë kënaqem në dobësi, në fyerje, në nevoja, në përndjekje, në ngushtica për shkak të Krishtit, sepse, kur jam i dobët, atëherë jam i fortë” (2 Korintasve 12:7, 10). “Dhe jo vetëm kaq, por mburremi edhe në shtrëngimet, duke ditur që shtrëngimi prodhon këmbënguljen” (Romakëve 5:3).

Bibla na tregon se si duhet të sillet një i krishterë gjatë kohës që ai ose ajo përjeton prova. Ai ose ajo duhet të ngazëllehet, të lutet, të këndojë dhe të punojë. “Ta konsideroni një gëzim të madh, o vëllezër të mi, kur ndodheni përballë sprovash nga më të ndryshmet” (Jakobi 1:2)… “Aty nga mesnata Pali dhe Sila po luteshin dhe i këndonin himne Perëndisë; dhe të burgosurit i dëgjonin” (Veprat e Apostujve 16:25)... “Prandaj edhe ata që vuajnë sipas vullnetit të Perëndisë, le t’i besojnë shpirtrat e vet atij, si te Krijuesi besnik, duke bërë të mirën” (1 Pjetrit 4:19). Prandaj edhe besimtari nuk duhet të heqë dorë nga të luturit, nga të adhuruarit dhe nga të bindurit Perëndisë, thjesht sepse po përjeton kohë të vështira.

Premtimet e Perëndisë për ata që i durojnë provat

Palit iu thanë këto fjalë lidhur me gjëmbin në mish: “Hiri im të mjafton, sepse fuqia ime përsoset në dobësi” (2 Korintasve 12:9). Perëndia i premton popullit të tij gjithashtu edhe çlirim në kohë prove. “Engjëlli i Zotit zë vend rreth atyre që kanë frikë prej tij dhe i çliron” (Psalmi 34:7). Fuqia e Perëndisë është e mjaftueshme për të na ruajtur. E megjithatë, Ai zgjedh ëngjëjt e Tij për të na mbrojtur e për të na çliruar nga shkatërrimi. Një premtim tjetër është kurora e drejtësisë. Pali tha: “Luftën e mirë e luftova, e përfundova vrapimin, e ruajta besimin. Pas kësaj më pret gati kurora e drejtësisë” (2 Timoteut 4:7-8).

Provat janë pjesë e jetës

Disa prej problemeve tona janë të lidhura drejtpërsëdrejti me vetë mëkatet tona. “Gjykimi i mirë siguron favor, por veprimi i të pabesëve është i dëmshëm” (Fjalët e Urta 13:15). Por, disa prej vështirësive që kalojmë, vijnë si rezultat i të bërit atë që është e drejtë. “Të gjithë ata që duan të rrojnë me perëndishmëri në Krishtin Jezus do të përndiqen” (2 Timoteut 3:12).

E megjithatë, për çdo “vështirësi”, Perëndia ka siguruar një rrugëdalje. “Asnjë tundim nuk ju ka gjetur juve, përveç se tundimi njerëzor; por Perëndia është besnik dhe nuk do të lejojë që t’ju tundojnë përtej fuqive tuaja, por me tundimin do t’ju japë dhe rrugë dalje, që ju të mund ta përballoni” (1 Korintasve 10:13). Jakobi shkruan kështu lidhur me provat: “Ta konsideroni një gëzim të madh, o vëllezër të mi, kur ndodheni përballë sprovash nga më të ndryshmet, duke e ditur se sprova e besimit tuaj sjell qëndrueshmëri” (Jakobi 1:2-3).

Përfundim   

© Page created 6 April 2007