Lindja e Virgjër - Sa rëndësi ka kjo?

Parathënie

Pse ka kaq shumë rëndësi lindja e Krishtit prej virgjëreshës Mari, kur bëhet fjalë për planin e Perëndisë në lidhje me shpëtimin tonë? A do të kishte patur ndonjë problem, po qe se, nga ana biologjike, Jozefi do të kishte qenë babai i Jezusit? Nëse Jezusi do të ishte ngjizur pikërisht në të njëjtën mënyrë si edhe ne të tjerët, atëherë as që nuk do ta diskutonim fare një doktrinë të tillë të rëndësishme. Historia e lindjes së një djali këtu e 2000 vjet më parë do të ish harruar fare, ashtu siç janë harruar historitë e mijëra fëmijëve të tjerë të lindur rreth asaj kohe. Por, është pikërisht deklarata se Shpëtimtari ynë lindi prej një virgjëreshe ajo, që e bën lindjen e Tij jashtëzakonisht të veçantë.

Jezusi ishte plotësisht njeri

Edhe pse Gjoni nuk na thotë asgjë rreth lindjes së Jezusit, prapëseprapë ai na tregon se Jezusi u bë Ai, që nuk ishte më parë: "Dhe Fjala u bë mish dhe banoi ndër ne" (Gjoni 1:14). Pikërisht këtë kuptim ka edhe emri "Emanuel" - "Perëndia me ne". "Ja, virgjëresha do të mbetet shtatzënë dhe do të lindë një djalë, të cilit do t’i venë emrin Emanuel, që do të thotë: "Zoti me ne"” (Mateu 1:23).

Ka patur nga ata njerëz, që kanë sugjeruar se Jezusi ishte thjesht një engjëll, që, për një farë kohe, mori formën e trupit njerëzor. Ata që kanë bërë sugjerime të tilla, i kanë bazuar thëniet e tyre tek fakti se, shpeshherë, në Dhiatën e Vjetër engjëjt iu shfaqën njerëzve nga ana trupore dhe hëngrën e pinë së bashku me ta. Por, është për t'u theksuar fakti se askund në Bibël nuk na thuhet se ka patur engjëj, që kanë vdekur si siç vdesin njerëzit. Për më tepër, Hebrenjve 1:5 thotë: "Sepse cilit nga engjëjt i tha ndonjëherë: “Ti je Biri im, sot më je lindur”? Edhe përsëri: “Unë do t’i jem Atë, dhe ai do të më jetë Bir”?" Fakti qëndron këtu se vetë engjëjt adhurojnë Birin e Vetëmlindur të Perëndisë: "Dhe akoma, kur ta shtjerë të Parëlindurin në botë, thotë: “Le ta adhurojnë të gjithë engjëjt e Perëndisë” (Hebrenjve 1:6). Është gabim i madh, madje mashtrim, të thuash se Jezusi ishte vetëm një engjëll i lartësuar, që u bë Bir i Perëndisë. "Sepse ai nuk kujdeset për engjëjt, por ndihmon pasardhjen e Abrahamit" (Hebrenjve 2:16). E si mund të jetë Jezusi thjesht një engjëll, kur edhe vetë engjëjt nuk e kuptojnë plotësisht planin e Perëndisë në lidhje me shpëtimin? "Dhe atyre iu zbulua se ata i administronin jo për vete, po për ne, ato gjëra që po ju rrëfehen tani nga ata që ju kanë predikuar ungjillin, me anë të Frymës së Shenjtë të dërguar nga qielli; gjëra të cilat engjëjt dëshirojnë t’i vëzhgojnë" (1 Pjetrit 1:12).

Jezusi, duke qenë se ishte plotësisht njeri, i përjetoi vetë vështirësitë, problemet dhe vuajtjet tona. "Sepse ne nuk kemi kryeprift që nuk mund t’i vijë keq për dobësitë tona, po një që u tundua në të gjitha ashtu si ne, por pa mëkatuar" (Hebrenjve 4:15). Për 33 vjet me rradhë si njeri në këtë botë, Ai e dinte se ç'ishte vuajtja, uria, etja dhe lodhja, ashtu siç e dimë edhe ne. Në vend që të ishte një Perëndi, që e vështronte njerëzimin nga larg, Jezus Krishti, Biri i Perëndisë, erdhi në botë për ta përjetuar Vetë të qënit njeri, me qëllim që të bëhej me të vërtetë Shpëtimtari ynë. "Prandaj ai duhej t’u ngjante në çdo gjë vëllezërve, që të mund të ishte i mëshirshëm e kryeprift besnik në ato që i përkasin Perëndisë, për për t’u bërë pajtim për mëkatet e popullit, sepse, duke qenë se ai vetë hoqi kur u tundua, mund t’u vijë në ndihmë atyre që tundohen" (Hebrenjve 2:17-18).

Asnjëra prej këtyre gjërave të mësipërme nuk do të ishte e vërtetë, po qe se Jezusi do të ishte thjesht një njeri i lindur në mënyrë natyrale (si gjithë të tjerët), apo thjesht një engjëll, i dërguar prej Perëndisë për të marrë përvojë njerëzore.

Jezusi ishte plotësisht Perëndi

Kemi dëgjuar ca që thonë se Jezus Krishti ishte një bir i Perëndisë e jo Biri i Perëndisë. Bibla e ka një arsye pse e quan Krishtin "Biri i Perëndisë". Fëmija që u lind prej virgjëreshës, ishte ndryshe prej fëmijëve të tjerë të lindur në të njëjtën ditë. Ai kishte egzistuar, para se të lindte e, për më tepër, kishte egzistuar si Perëndi i Përjetshëm: "Por ti, o Betlem Efratah, megjithëse je i vogël midis mijërave të Judës, nga ti do të dalë për mua ai që do të jetë sundues në Izrael, origjinat e të cilit janë nga kohërat e lashta, nga ditët e përjetësisë" (Mikaia 5:2)... "Sepse na ka lindur një fëmijë, një djalë na është dhënë. Mbi supet e tij do të mbështetet perandoria dhe do të quhet Këshilltar i admirueshëm, Perëndi i fuqishëm, Atë i përjetshëm, Princ i paqes" (Isaia 9:6). Jezusi tha kështu rreth Vetes: "Në të vërtetë, në të vërtetë unë po ju them: para se të kishte lindur Abrahami, unë jam” (Gjoni 8:58).

Fëmija i lindur në një stallë bagëtish, ishte me të vërtetë Biri i Perëndisë. Këtu e shohim pikërisht dhuratën e parë të dhënë për Krishtlindje: "Sepse Perëndia e deshi aq botën, sa dha Birin e tij të vetëmlindurin, që, kushdo që beson në të, të mos humbasë, por të ketë jetë të përjetshme" (Gjoni 3:16). Lindja e Krishtit është me të vërtetë e jashtëzakonshme dhe shumë e vështirë për t'u kuptuar. "Dhe s’ka asnjë dyshim se misteri i mëshirës është i madh: Perëndia u shfaq në mish" (1 Timoteut 3:16). Kjo është njëra nga arsyet, që e bën lindjen e virgjër të Krishtit kaq të veçantë dhe kaq të rëndësishme, sepse ai fëmijë në grazhd mbante në duart e Tij tërë fuqinë e Perëndisë: "Sepse tek ai banon trupërisht gjithë plotësia e Hyjnisë" (Kolosianëve 2:9).

Përfundim

© 24/12/2008