Neveria e Shkretimit

"Ai u përgjigj: "Shko, Daniel, sepse këto fjalë janë të fshehura dhe të vulosura deri kohën e mbarimit. Shumë njerëz do të pastrohen, do të zbardhen dhe do të përsosen; por të pabesët do të veprojnë me pabesi dhe asnjë nga të pabesët nuk do të kuptojë, por do të kuptojnë njerëzit e ditur. Nga koha që do të ndalohet flijimi i përditshëm dhe do të ngrihet neveria që shkakton shkretimin do të kalojnë njëmijë e dyqind e nëntëdhjetë ditë. Lum ai që pret dhe arrin në njëmijë e treqind e tridhjetë e pesë ditë. Por ti shko drejt mbarimit tënd; do të prehesh dhe pastaj do të ngrihesh përsëri për të marrë pjesën tënde të trashëgimisë në mbarim të ditëve"" (Danielit 12:9-13).

Parathënie

Sipas Biblës, e neveritshme është ajo gjë, që duket e neveritshme në sytë e Perëndisë. Danieli, në profecinë e tij, bën fjalë rreth një ngjarjeje të caktuar në historinë botërore, një ngjarje, e cila do të përmbushet në Ditët e Fundit.

Ç'është neveria e shkretimit?

Neveria, që përmendet në Bibël, i referohet si diçkaje, ashtu edhe dikujt. "Nga koha që do të ndalohet flijimi i përditshëm dhe do të ngrihet neveria që shkakton shkretimin do të kalojnë njëmijë e dyqind e nëntëdhjetë ditë" (Danielit 12:11)... "Askush të mos ju gënjejë kursesi, sepse ajo ditë nuk do të vijë, pa ardhur më parë rënia dhe pa u shfaqur njeriu i mëkatit, i biri i humbjes, kundërshtari, ai që lartëson veten mbi çdo gjë që quhet perëndi ose objekt adhurimi, aq sa të shkojë e të rrijë në tempullin e Perëndisë si Perëndi, duke e paraqitur veten se është Perëndi" (2 Thesalonikasve 2:3-4). Kështu pra, neveria e shkretimit është ai imazh, që vendos Antikrishti në Tempullin e Izraelitëve në Jeruzalem. Sipas Zbulesës 13:15, ky imazh do të jetë në gjendje të komunikojë. "Dhe iu dha t’i japë një frymë figurës së bishës, aq sa figura e bishës të flasë, edhe të bëjë që të gjithë ata të cilët nuk e adhuronin figurën e bishës, të vriteshin". Për t'ia arritur këtij qëllimi, ndoshta, djalli do të përdorë metoda të reja teknologjike, si ajo e holografisë.

Kur?

Imazhi do të instalohet në mes të periudhës 7-vjeçare. "Ai do të lidhë gjithashtu një besëlidhje me shumë njerëz për një javë, por në mes të javës do t’i japë fund flijimit dhe blatimit; dhe mbi krahët e veprimeve të neveritshme do të vijë një shkatërrues, deri sa shkatërrimi i plotë, që është dekretuar, do të bjerë mbi shkatërruesin" (Danieli 9:27). Ka shumë të ngjarë që kjo ngjarje të ndodhë pak më përpara, sesa kisha e Krishtit të rrëmbehet në Qiell. "Sepse Zoti vetë, me një urdhër, me zë kryeengjëlli dhe me borinë e Perëndisë, do të zbresë nga qielli dhe ata që vdiqën në Krishtin do të ringjallen të parët; pastaj ne të gjallët, që do të kemi mbetur, do të rrëmbehemi bashkë me ata mbi retë, për të dalë përpara Zotit në ajër; dhe kështu do të jemi përherë bashkë me Zotin" (1 Thesalonikasve 4:16-17). Kjo ngjarje do të pasohet prej një periudhe vuajtjeje dhe mundimesh të papara ndonjëherë në botë. "Sepse atëherë do të ketë një mundim aq të madh, sa nuk ka ndodhur kurrë që nga krijimi i botës e deri më sot, dhe as nuk do të ketë më kurrë!" (Mateu 24:21).

Kush do ta adhurojë imazhin?

Ata që nuk e njohin Jezus Krishtin si Zot dhe Shpëtimtar, do të jenë të detyruar për ta adhuruar Antikrishtin. Këtu gjen përmbushjen e vet edhe rebelimi i parë. "Vallë, si ke rënë nga qielli, o Lucifer, bir i agimit? Vallë si të hodhën për tokë ty që i hidhje poshtë kombet? Ti thoshnje në zemrën tënde: "Unë do të ngjitem në qiell, do të ngre fronin tim përmbi yjet e Perëndisë; do të ulem mbi malin e asamblesë në pjesën skajore të veriut; do të ngjitem mbi pjesët më të larta të reve, do të jem i ngjashëm me Shumë të Lartin". Po përkundrazi do të hidhesh në Sheol, në thellësitë e gropës" (Isaia 14:12-15).

Ata që do t'i shkojnë pas Bishës, do ta nderojnë atë, duke e pranuar damkën e tij. "Dhe do ta adhurojnë të gjithë banorët e dheut, emrat e të cilëve nuk janë shkruar në librin e jetës së Qengjit, që ishte vrarë që nga krijimi i botës... Veç kësaj bëri që të gjithëve, të vegjël e të mëdhenj, dhe të pasur dhe të varfër, dhe të lirë dhe skllevër, t’u vihet një damkë mbi dorën e tyre të djathtë ose mbi ballin e tyre, dhe që askush të mos mund të blinte ose të shiste, po të mos kishte damkën ose emrin e bishës ose numrin e emrit të saj" (Zbulesa 13:8, 16-17). Ky numër përfshin të gjithë ata, që do ta mohojnë Ungjillin e Krishtit, para se të rrëmbehet kisha në Qiell. "Atëherë do të shfaqet ky i paudhë, të cilin Zoti do ta shkatërrojë me hukatjen e gojës së tij dhe do ta asgjësojë me të dukurit e ardhjes së tij. Ardhja e atij të paudhi do të bëhet me anë të veprimit të Satanit, bashkë me çudira, shenja dhe mrrekullish të rreme, dhe nga çdo mashtrim ligësie për ata që humbin, sepse nuk pranuan ta duan të vërtetën për të qenë të shpëtuar. E prandaj Perëndia do t’u dërgojë atyre një gënjim që do t’i bëjë të gabojnë, që t’i besojnë gënjeshtrës, që të dënohen të gjithë ata që nuk i besuan së vërtetës, por përqafuan ligësinë!" (2 Thesalonikasve 2:8-12).   

Përfundim                      

Në këtë studim, lexuam pak rreth rebelimit të Satanait në Qiell. Por tek Zanafilla 3:4-5, shohim rebelimin, që shkaktoi Satanai në tokë, kur e tundoi Adamin dhe Evën, duke iu thënë që të mos e besonin fjalën e Perëndisë. "Atëherë gjarpri i tha gruas: "Ju s’keni për të vdekur aspak; por Perëndia e di që ditën që do t’i hani, sytë tuaj do të hapen dhe do të jeni në gjendje si Perëndia të njihni të mirën dhe të keqen". Që prej atij momenti, njeriu, nëpërmjet udhëheqjes së djallit, ishte i destinuar për t'u bërë vetë zot i vetvetes. Imazhi i Antikrishtit në tempull është pika kulminante e idhujtarisë, d.m.th. drejt kësaj pike është drejtuar gjithmonë adhurimi i zotërve dhe imazheve të rreme. Neveria e Shkretimit është sulmi përfundimtar i Satanait kundër Perëndisë. "Dhe kur të shihni neverinë e shkatërrimit, të parathënë nga profeti Daniel, e cila qëndron atje ku nuk duhej të ishte (ai që lexon le ta kuptojë)" (Marku 13:14).

© 27/9/2008