Perëndia sheh, dëgjon dhe di gjithçka

Teksti i studimit: 2 Mbretërve 17:1-12

Parathënie

Në vargun 9-të të tekstit të mësipërm, thuhet: "Bijtë e Izraelit kishin kryer gjithashtu në mënyrë të fshehtë kundër Zotit, Perëndisë të tyre, gjëra jo të drejta". Izraelitët kujtonin se mëkatet e tyre mund të mbaheshin të fshehura prej Perëndisë, por Pali tha: "Dhe nuk ka asnjë krijesë që të jetë e fshehur para tij, por të gjitha janë lakuriq dhe të zbuluara para syve të Atij, të cilit ne do t’i japim llogari" (Hebrenjve 4:13). Izraelitët e kishin gënjyer veten, duke menduar se Perëndia nuk dinte gjithçka e nuk ishte i plotfuqishëm. Shkurtimisht, pra, ata e kishin harruar fare Perëndinë.

Perëndia i di sekretet tona

Ndoshta të tjerët mund të mos e dinë se ç'ndodh në jetën tonë private. Por Perëndia e di gjithçka që bëjmë. Ai dëgjon gjithçka që themi dhe regjistron gjithçka që mendojmë. "Sepse fjala e Perëndisë është e gjallë dhe vepruese, më e mprehtë se çdo shpatë me dy tehe dhe depërton deri në ndarjen e shpirtit dhe të frymës, të nyjeve dhe të palcave, dhe është në gjendje të gjykojë mendimet dhe dëshirat e zemrës" (Hebrenjve 4:12). Ja, disa shembuj:

1. Eva ndoshta kujtoi se askush nuk e vuri re, atëherë kur nuk iu bind urdhërimit të Perëndisë. Por shumë shpejt, ajo dëgjoi vetë Perëndinë, që e pyeti: "Pse e bëre këtë?" (Zanafilla 3:13). Nuk kishte asnjë gjethe fiku, që ta mbante të fshehtë shpirtin fajtor prej syve të Perëndisë.

2. Perëndia e pa Kainin, tek e varrosi fshehtas trupin e vëllait të tij: "Dhe Kaini foli me të vëllanë, Abelin; kur u gjendën në fushë, Kaini u ngrit kundër vëllait të tij Abelit dhe e vrau. Atëherë Zoti i tha Kainit: "Ku është vëllait yt Abeli?". Ai u përgjegj: "Nuk e di; mos jam unë rojtari i vëllait tim?". Zoti i tha: "Çfarë ke bërë? Zëri i gjakut të vëllait tënd më vëngon nga toka" (Zanafilla 4:8-10).

3. Perëndia e pa mëkatin, që kreu Davidi fshehurazi, por Ai iua bëri të njohur të gjithëve ndëshkimin e merituar: "Sepse ti e ke bërë këtë gjë fshehurazi, kurse unë do ta bëj përpara tërë Izraelit në dritën e diellit" (2 Samuelit 12:12).

4. Perëndia e pa adhurimin e drejtuar fshehurazi idhujve e perëndive të rreme në Tempull: "Pastaj më tha: "Bir njeriu, a ke parë atë që bëjnë pleqtë e shtëpisë së Izraelit në errësirë, secili në dhomën e figurave të tij? Në fakt thonë: "Zoti nuk na shikon, Zoti e ka braktisur vendin"" (Ezekielit 8:12).

5. Perëndia e dinte se ç'bluanin në zemër Ananiasi dhe Safira (shiko Veprat e Apostujve 5:1-12).

Le të mos e gënjejmë veten

Vetëm të ligët e gënjejnë veten, duke kujtuar se Perëndia nuk iua vë re mëkateve, që kryejnë. Kujtojnë se Perëndia nuk i sheh e nuk di gjë rreth mëkateve të tyre sekrete. "Gjërat e fshehta i përkasin Zotit, Perëndisë tonë" (Ligji i Përtërirë 29:29). Ai sheh gjithçka, që bën çdo njeri në çdo vend të botës. Ai i sheh komplotet, që thur terroristi, tek planifikon sulmin e tij vetëvrasës. Ai i dëgjon detajet e sakta të hajdutëve, tek thurin plane për të grabitur bankën. "Ti i vë fajet tona para teje, mëkatet tona të fshehta në dritën e fytyrës sate" (Psalmi 90:8). Ai vë re çdo vepër të ligë, çdo plan e çdo qëllim. Anjë prej tyre nuk i shpëton syrit të Tij. "A jam unë vetëm një Perëndi nga afër," thotë Zoti, "apo dhe një Perëndi nga larg? A mundet dikush të fshihet në vende të fshehta në mënyrë që unë të mos e shoh?," thotë Zoti. "A nuk e mbush unë qiellin dhe tokën?," thotë Zoti" (Jeremia 23:23-24). Ai nuk ka nevojë për mikrofona përgjimi, sepse Ai është Perëndia, që di e që sheh gjithçka. Prandaj edhe asnjë mëkatar nuk mund të thotë dot se s'do të pësojë ndonjë ndëshkim për mëkatin e tij. "Të jeni të sigurtë që mëkati juaj do t’ju gjejë" (Numrat 32:23).

Perëndia i ka parë gjërat, që kemi vjedhur. Ai i ka dëgjuar gënjeshtrat, që kemi thënë. Ai e di se kujt i mbajmë mëri. Ai mund ta lexojë çdo mendim mëkatar, që kemi në mendje. Të gjithë ata që na rrethojnë, do të habiteshin, po t'i dinin të gjitha ato gjëra, që di Perëndia rreth nesh. Por një ditë, gjithçka do të dalë përpara gjyqit: "Të gjithë, pra, do të dalim përpara gjykatës së Krishtit" (Romakëve 14:10)..."Por unë po ju them se ditën e gjyqit njërëzit do të japin llogari për çdo fjalë të kotë që kanë thënë" (Mateu 12:36)..."Sepse Perëndia do të vërë të gjykohet çdo vepër, edhe çdo gjë që është fshehur, qoftë e mirë apo e keqe" (Predikuesi 12:14). Perëndia mban shënim në Qiell gjithçka që bëjmë ne në tokë. "Pastaj pashë një fron të madh të bardhë dhe atë që ulej mbi të, nga prania e të cilit iku dheu dhe qielli, dhe nuk u gjet vënd për ata. Dhe pashë të vdekurit, të mëdhenj e të vegjël, që rrinin në këmbë përpara Perëndisë, edhe librat u hapën; dhe u hap një libër tjetër, që është libri i jetës; dhe të vdekurit u gjykuan në bazë të gjërave të shkruara në libra, sipas veprave të tyre. Dhe deti i dorëzoi të vdekurit që ishin në të, dhe vdekja dhe Hadesi dorëzuan të vdekurit që ishin në ta; dhe ata u gjykuan secili sipas veprave të veta. Pastaj vdekja dhe Hadesi u flakën në liqenin e zjarrit. Kjo është vdekja e dytë. Dhe, nëse ndokush nuk u gjet i shkruar në librin e jetës, u flak në liqenin e zjarrit" (Zbulesa 20:11-15).

Përfundim

Nuk kemi pse të frikësohemi prej një Perëndie që sheh, dëgjon e di gjithçka, kur zemrën e kemi të sinqertë përpara Tij. Nëse jemi në gjendje të kryejmë veprime të liga fshehurazi, atëherë nga kjo rrjedh se jemi në gjendje, po ashtu, për të kryer edhe veprime të mira fshehurazi. Nëse mundohemi për të bërë mirë fshehurazi, atëherë të jemi të sigurtë se Perëndia i mban shënim veprime të tilla, edhe atëherë kur të tjerët nuk na e vënë re fare. "Ati yt, që shikon në fshehtësi, do të ta shpërblejë publikisht" (Mateu 6:6)... "Askush, pasi të ketë ndezur llambën, nuk e mbulon me një enë ose e fut nën shtrat, por e vë mbi mbajtësen e vet me qëllim që ata që hyjnë të shohin dritë. Sepse nuk ka asgjë të fshehtë që nuk do të zbulohet, as sekret që të mos njihet dhe të dalë në dritë" (Luka 8:16-17). Duhet të lutemi bashkë me Davidin: "Kush i njeh gabimet e tij? Pastromë nga ato që nuk i shoh. Përveç kësaj ruaje shërbëtorin tënd nga mëkatet e vullnetit, dhe bëj që ato të mos më sundojnë mua; atëherë unë do të jem i ndershëm dhe i pastër nga shkelje të mëdha" (Psalmi 19:12-13). Agari e njohu Perëndinë me emrin 'El Roi' - Perëndia që sheh (Zanafilla 16:13). Psalmi 139 e përshkruan në mënyrë të përsosur Perëndinë që sheh gjithçka, të Cilit i shërbejmë edhe ne. Në librin e tij, 'Karakteri i Perëndisë', autori R.C. Sproul shkruan kështu: "Në jetën time, ka shumë gjëra, të cilat nuk dua që të m'i shikojë Krishti. E megjithatë, e di se asgjë nuk është e fshehur prej Tij. Ai më njeh më mirë, sesa ç'më njeh gruaja ime. E prapëseprapë, Ai më do. Një hir i tillë i Perëndisë është gjëja më e mahnitshme nga të gjitha. Po ta gënjenim Perëndinë e ta bënim që të kujtonte se ishim më të mirë se ç'jemi në të vërtetë, atëherë Ai patjetër që do të na donte. Por, Ai di gjithçka rreth nesh, duke përfshirë këtu edhe ato gjëra, që mund të na e shkatërrojnë fare reputacionin që kemi. Ai e di mirë me hollësi çdo sekret që kemi. E prapëseprapë, Ai na do".