Të Lindurit e Krishtit Prej Virgjëreshës -
A na e mëson Bibla këtë doktrinë?

Parathënie

Dhiata e Re nis me një tregim rreth diçkaje, që, nga ana biologjike, duket si e pamundur. Lindja e një foshnjeje më shumë se 2000 vjet më parë, pa patur nevojën e një babai, duket si përrallë. Prandaj, pra, edhe lindja e Jezusit, prej një vajze të virgjër me emrin Mari, është mrekullia më e madhe e të gjitha kohërave. Lindja e Krishtit, ashtu siç na paraqitet tek ungjijtë e Dhiatës së Re, është historia më e famshme e treguar ndonjëherë - epiqendra e shpëtimit tonë, sepse pa Krishtin, nuk do të kishim as Shpëtimtar.

Ujë i trazuar

Fatkeqësisht, fetë e rreme pagane, si edhe traditat dhe zakonet e njerëzve i kanë shtrembëruar fare faktet lidhur me lindjen e Krishtit. E vërteta rreth kësaj lindjeje nuk i ngjan më ujit të pastër si kristali, por është kthyer në ujë të trazuar. P.sh. bota e feston lindjen e Krishtit më 25 dhjetor, por kjo datë nuk është data e saktë e lindjes së Tij. Ka shumë të ngjarë që Krishti të ketë lindur në shtator. Për më tepër, skenat e bukura të barinjve dhe të dijetarëve mbledhur rreth e rrotull grazhdit, i kanë shtrembëruar faktet e vërteta të kësaj ngjarjeje. Dijetarët bëhen pjesëtarë të kësaj historie vetëm atëherë, kur Jezusi ishte rreth moshës 2-vjeçare. "Dhe ata, pasi e dëgjuan mbretin, u nisën; dhe ja, ylli që kishin parë në lindje u shkonte përpara atyre derisa u ndal përmbi vendin ku ndodhej fëmija. Ata, kur e panë yllin, u gëzuan me gëzim shumë të madh. Dhe, mbasi hynë në shtëpi, panë fëmijën me Marien, nënën e tij, dhe ranë përmbys dhe e adhuruan. Pastaj hapën thesaret e tyre dhe dhuruan: ar, temjan dhe mirrë...Atëherë Herodi, duke parë se dijetarët e kishin mashtruar, u zemërua fort dhe urdhëroi të vriten të gjithë fëmijët meshkuj që ishin në Bethlehem dhe në tërë rrethinën e tij, nga dy vjeç e poshtë, sipas kohës të cilën e kishte hetuar me kujdes nga Dijetarët" (Mateu 2:9-11, 16).

Kisha katolike beson se Maria mbeti e virgjër, derisa vdiq. Por Bibla nuk na e sugjeron aspak një gjë të tillë. Maria ishte e virgjër vetëm deri atëherë sa "ajo lindi djalin e saj të parëlindur" (Mateu 1:25). Prej Mateut 13:55-56 mësojmë gjithashtu se Jezusi kishte vëllezër e motra nga Maria dhe Jozefi. "A nuk është ky i biri i marangozit? Nuk quhet nëna e tij Mari, dhe vëllezërit e tij Jakob, Iose, Simon dhe Juda? Dhe motrat e tij nuk janë të gjitha ndër ne? Atëherë nga i erdhën këtij të gjitha këto?”. Besimi në virgjërinë e përjetshme të Maries e ka origjinën tek mësimet e Gnostikëve, të cilët kujtonin se riprodhimi seksual ishte mëkat.

Lindja e virgjër

Pa dyshim, Bibla na mëson se Maria ishte e virgjër. "Prandaj vet Zoti do t’ju japë një shenjë: Ja, e virgjëra do të mbetet me barrë dhe do të lindë një fëmijë të cilin do ta quajë Emanuel" (Isaia 7:14, shiko Mateun 1:23)... "Në muajin e gjashtë, engjëlli Gabriel u dërgua nga Perëndia në një qytet të Galilesë, që quhej Nazaret, te një e virgjër, që ishte e fejuar me një njeri që quhej Jozef, nga shtëpia e Davidit; dhe emri i virgjëreshës ishte Maria" (Luka 1:26-27). Maria e deklaroi vetë se ishte e virgjër: "Dhe Maria i tha engjëllit: “Si do të ndodhë kjo, përderisa unë nuk njoh burrë?” (Luka 1:34).

Bibla na e bën plotësisht të qartë faktin se, nga ana biologjike, Jozefi nuk ishte babai i Jezusit. "Tani lindja e Jezu Krishtit ndodhi në këtë mënyrë: Maria, nëna e tij, i ishte premtuar Jozefit, por para se të fillonin të rrinin bashkë, mbeti shtatzënë nga Frymën e Shenjtë. Atëherë Jozefi, i fejuari i saj, i cili ishte njeri i drejtë dhe nuk donte ta poshtëronte botërisht, vendosi ta linte fshehtas. Por, ndërsa bluante me vete këto çështje, ja që iu shfaq në ëndërr një engjell i Zotit dhe i tha: “Jozef, bir i Davidit, mos ki frikë ta marrësh me vete Marinë si gruan tënde, sepse ç’është ngjizur në të është vepër e Frymës së Shenjtë. Dhe ajo do të lindë një djalë dhe ti do t’i vësh emrin Jezus, sepse ai do të shpëtojë popullin e tij nga mëkatet e tyre” (Mateu 1:18-21). Fëmija, që kishte Maria në bark, ishte Biri i Perëndisë, e jo biri i njeriut. "Ai do të jetë i madh dhe do të quhet Biri i Shumë të Lartit; dhe Zoti Perëndi do t’i japë fronin e Davidit, atit të tij...Fryma e Shenjtë do të vijë mbi ty dhe pushteti i Shumë të Lartit do të të mbulojë me hijen e vet; prandaj i shenjti që do të lindë prej teje do të quhet Bir i Perëndisë" (Luka 1:32, 35). Vini re se sa të kujdesshëm tregohen si Mateu, ashtu edhe Luka, kur vjen puna për të dhënë me hollësi faktet e lindjes së Krishtit. "Jakobit i lindi Jozefi, bashkëshorti i Marisë, nga e cila lindi Jezusi, që quhet Krisht" (Mateu 1:16)... "Dhe Jezusi ishte rreth tridhjetë vjeç; dhe e pandehnin se ishte bir i Jozefit" (Luka 3:23).

Përfundim

"Sepse Perëndia e deshi aq botën, sa dha Birin e tij të vetëmlindurin, që, kushdo që beson në të, të mos humbasë, por të ketë jetë të përjetshme" (Gjoni 3:16). S'ka dyshim se fakti i lindjes së Krishtit gjendet në Bibël. Ta mohosh një fakt të tillë, është njëlloj sikur të kesh mohuar jo vetëm të vërtetën, por edhe Atë, që u lind për të na shpëtuar nga mëkati. Ai që e mohon Krishtin, ia ka përplasur në fytyrë Perëndisë dhuratën e Vet. "Ai që beson në të nuk dënohet, por ai që nuk beson tashmë është dënuar, sepse nuk ka besuar në emrin e Birit të vetëmlindur të Perëndisë" (Gjoni 3:18). Lindja e Krishtit prej virgjëreshës Mari mund të konsiderohet e pamundur nga ana biologjike, por pikërisht një fakt i tillë e kthen këtë lindje në një mrekulli. "Për njerëzit kjo është e pamundur, por për Perëndinë çdo gjë është e mundur” (Mateu 19:26). I njëjti Perëndi, që krijoi universin prej asgjëje dhe që e bëri krijesën e parë njerëzore sipas shëmbëlltyrës së Vet, është po ashtu në gjendje të krijojë jetë në mitrën e virgjëreshës, të quajtur Mari.

© 24/12/2008