Vetëm Perëndia e di të ardhmen

"Kush e di në fakt ç’është e mirë për njeriun në këtë jetë, gjatë tërë ditëve të jetës së tij të kotë që ai i kalon si një hije? Kush mund t’i thotë njeriut çfarë ka për të ndodhur pas tij nën diell?" (Predikuesit 6:12).

Parathënie

Kur lexojmë gazetën e përditshme, shohim parashikimet, që bëjnë njerëzit për të sotmen, të nesërmen dhe të ardhmen. Enciklopedia britanike e përshkruan astrologjinë si një "lloj parashikimi të ngjarjeve njerëzore dhe tokësore të së ardhmes, me anë të vështrimit dhe interpretimit të yjeve, që janë të fiksuar në qiell". Njerëzit shkojnë tek fallxhorët, apo tek ata që shohin filxhanin, apo lexojnë dhe dëgjojnë horoskopin për të marrë vesh prej këtyre metodave se ç'ka për t'u ndodhur atyre në ditët që do të vijnë.

Njeriu nuk mund ta dijë dot të ardhmen

"Edhe sikur budallai t’i shumojë fjalët e tij, njeriu nuk di se çfarë do të ndodhë; kush mund t’i thotë çfarë do të ndodhë pas tij?...Kështu e kuptova që nuk ka gjë më të mirë për njeriun se sa të gëzohet në punën e tij, sepse kjo është pjesa e tij. Kush do ta çojë në fakt të shohë atë që ka për të ndodhur pas tij?" (Predikuesit 10:14; 3:22). Në Dhiatën e Re, vargu që përputhet me atë që thotë Solomoni, gjendet tek Jakobi 4:14, " Ndërsa nuk dini për të nesërmen".

Edhe pse ka me miliona njerëz, që hedhin fall, duke pretenduar se e dinë se ç'do të ndodhë në të ardhmen, prapëseprapë, Perëndia nuk është në gjendje të gjejë qoftë edhe një mes tyre, që t'i shpjegojë kishës shenjat e zbulesës së Tij. "Pastaj pashë në dorën e djathtë të atij që rrinte ulur mbi fron, një libër të shkruar përbrenda dhe përjashta, të vulosur me shtatë vula. Dhe pashë një engjëll të fuqishëm, që proklamoi me zë të madh: “Kush është i denjë të hapë librin dhe të zgjidhë vulat e tij?”. Po kurrkush, as në qiell, as mbi dhe, as nën dhe, nuk mund të hapte librin e ta shihte atë" (Zbulesa 5:1-3). Asnjë njeri, asnjë djall dhe asnjë ëngjëll nuk ka fuqinë për të parashikuar e për të zbuluar ngjarjet e së ardhmes. I vetmi Ai, që e di se ç'do të ndodhë nesër, është vetë Krishti. "Ja, Luani i fisit të Judës, Rrënja e Davidit, fitoi të hapë librin dhe të zgjidhë të shtatë vulat e tij” (Zbulesa 5:5). Pse? Sepse Ai është "Krishti është i njëjtë dje, sot e përjetë" (Hebrenjve 13:8). Krishti është Ai, "që shpall fundin që në fillim, dhe shumë kohë më parë gjërat që ende nuk janë bërë" (Isaia 46:10). Lidhur me Veten e Tij, Ai thotë: "Unë jam Alfa dhe Omega, fillimi dhe mbarimi!" (Zbulesa 21:6).

Bibla na ofron një pamje panoramike të së ardhmes së botës. Djalli, që përdor të ashtu-quajturit astrologë, nuk do që njeriu ta dijë se ku do të përfundojë pa Perëndinë. Ai nuk do që njerëzit ta dinë se egziston Liqeni i Zjarrtë, që është në pritje të çdo shpirti, të çdo demoni, e të vetë Satanait. "Dhe, nëse ndokush nuk u gjet i shkruar në librin e jetës, u flak në liqenin e zjarrit" (Zbulesa 20:15). Edhe pse veprimet e kultit, magjitë, etj. janë të frymëzuara dhe të nxitura prej Satanait, Bibla në fakt i quan këto si vepra të mishit. "Dhe veprat e mishit janë të zbuluar dhe janë: kurorëshkelja, kurvëria, ndyrësia, shthurja, idhujtaria, magjia, armiqësimi, grindjet, xhelozitë, mëritë, zënkat, përçarjet, tarafet, smira, vrasjet, të dehurit, grykësia dhe gjëra të ngjashme me këto, për të cilat po ju paralajmëroj, si kurse ju thashë edhe më parë, se ata që i bëjnë këto gjëra nuk do të trashëgojnë mbretërinë e Perëndisë" (Galatasve 5:19-21). Horoskopi, hedhja e fallit, filxhani i kafes, etj. nuk mund ta parashikojnë dot të ardhmen. Këto janë metoda mashtrimi, që i çojnë shpirtrat e njerëzve në Ferr. "Kurse për frikacakët dhe të pabesët, dhe të neveritshmit dhe vrasësit, dhe kurvëruesit, dhe magjistarët, dhe idhujtarët, dhe gjithë gënjeshtarët, pjesa e tyre do të jetë në liqenin që digjet me zjarr dhe squfur, që është vdekja e dytë” (Zbulesa 21:8).

Na mjafton e sotmja

Të shkuarën s'e ndryshojmë dot. Të ardhmen s'e dimë dot. Por mund të merremi me problemet e së tashmes. Do të merakoseshim e do të shqetësoheshim edhe më shumë, po ta dinim se ç'do të na ndodhte nesër. "Mos u brengosni, pra, për të nesërmen, sepse e nesërmja do të kujdeset vetë për vete. Secilës ditë i mjafton pikëllimi i vet” (Mateu 6:34).

Sepse Ai jeton,
Kam fuqi për nesër;
sepse Ai jeton,
më frikë s'kam;
sepse e di, e di
se Ai mban të ardhmen
dhe jeta ime sot ka vlerë,
sepse Ai jeton.

Edhe përsa i përket domosdoshmërisë për ta pranuar Krishtin si Shpëtimtar, Bibla kurrë nuk na thotë se njeriu duhet të bëjë plan në këtë ditë apo atë ditë për t'u shpëtuar. "Sepse ai thotë: “Në kohë të pëlqyer unë të dëgjova dhe në ditë shpëtimi të ndihmova”. Ja, pra, koha e pëlqyer, ja, pra, dita e shpëtimit" (2 Korintasve 6:2). "Tani", "sot" është dita e shpëtimit, jo pas një ore, apo javës tjetër, sepse askush nuk e di, nëse do të jetë gjallë deri atëherë. "Tokat e një pasaniku dhanë të korra të bollshme; dhe ai arsyetonte me vete duke thënë: "Ç’të bëj, sepse nuk kam vend ku t’i shtie të korrat e mia?". Dhe tha: "Këtë do të bëj: do të shemb hambarët e mia dhe do t’i bëj më të mëdhenj, ku do të shtie të gjitha të korrat dhe pasuritë e tjera, dhe pastaj do t’i them shpirtit tim: Shpirt, ti ke pasuri të shumta të shtëna për shumë vjet; pusho, ha, pi dhe gëzo". Por Perëndia i tha: "O i pamend, po atë natë shpirtin tënd do të ta kërkojnë dhe ato që përgatite të kujt do të jenë?" (Luka 12:16-20).

Le ta lëmë të ardhmen tonë në duart e Atij, që di gjithçka. "Sepse unë jam Perëndia dhe nuk ka asnjë tjetër; jam Perëndia dhe askush nuk më ngjet mua, që shpall fundin që në fillim, dhe shumë kohë më parë gjërat që ende nuk janë bërë, duke thënë: "Plani im do të realizohet dhe do të bëj gjithçka më pëlqen" (Isaia 46:9-10). Vetëm atëherë të gjitha gjërat do të "bashkëveprojnë për të mirë për ata që e duan Perëndinë, për ata që janë të thirrur sipas qëllimit të tij" (Romakëve 8:28). E vetmja kohë, kur duhet të sigurohemi se gjithçka është në rregull, është e tashmja. "Duke e shfrytësuar kohën, sepse ditët janë të mbrapshta" (Efesianëve 5:16).

Përfundim                      

Astrologjia dhe metodat e tjera, që mundohen t'i hedhin një sy të ardhmes, janë thjesht përpjekjet, që bën njeriu, për të qenë zot i vetvetes e për ta kontrolluar vetë fatin e tij. Të krishterët, që i besojnë Biblës, duhet t'i qëndrojnë larg çdo lloj gjëje, që ka të bëjë me magjitë, hedhjen e fallit, horoskopin, etj. dhe duhet t'iu thonë edhe të tjerëve, që të veprojnë në të njëjtën mënyrë e të mos merren me gjëra të tilla. "Shumë nga ata që ishin marrë me magji i sollën librat dhe i dogjën përpara të gjithëve; dhe, mbasi e llogaritën çmimin e tyre, gjetën se ishin pesëdhjetë mijë pjesë argjendi" (Veprat e Apostujve 19:19). E ardhmja jonë nuk është tek llumi i filxhanit të kafes, apo tek yjet e qiellit, por tek Krishti.

"E di se kush e mban të ardhmen,
e di se kush fort dorën ma shtrëngon.
Me Perëndinë, asgjë nuk ndodh rastësisht,
Ai gjithçka e planifikon.
Prandaj edhe do të ballafaqohem me të nesërmen,
Me problemet e saj të vogla e të mëdha.
Do t'i besoj Perëndisë së mrekullive,
Do t'i jap Atij gjithçka"

(Nga A.B. Smith)

© 15/11/2008