Ku ka ikur gëzimi?

"Këto gjëra jua kam thënë që gëzimi im të qëndrojë në ju dhe gëzimi juaj të jetë i plotë" (Gjoni 15:11).

Parathënie

Sot, me gjendjen e vështirë ekonomike që po kalon bota, si edhe me lajmet e këqija që dëgjojmë dita-ditës, nuk na vjen më për të qeshur, apo për ta vënë sadopak buzën në gaz e për të qenë të gëzuar. E megjithatë, ideja e gëzimit gjendet kudo në Bibël. Një ide e tillë është një nga mjetet e domosdoshme të jetës së krishterë. "Jini gjithmonë të gëzuar" (1 Thesalonikasve 5:16)... "Gëzohuni gjithnjë në Zotin; po jua them përsëri: Gëzohuni!" (Filipianëve 4:4).

Burimi i gëzimit

Në vargun e studimit tonë, Jezusi na e bën të qartë se gëzimi i vërtetë gjendet vetëm në Të. Prandaj, pra, është gëzimi i Tij, e jo i yni, apo i botës, i cili na e ndryshon përjetësisht jetën. Ai nuk na e ofron gëzimin pak nga pak, por na jep një gëzim të plotë, që nuk mund të përshkruhet dot me fjalë. "Të cilin, megjithëse ju nuk e keni parë, e doni, duke besuar në të, megithëse tani nuk e shihni, dhe ngazëllohuni nga një hare e patregueshme dhe e lavdishme" (1 Pjetrit 1:8).

Lumturia tokësore e ka si zakon, që të zhduket si mjergulla. Por gëzimi i krishterë është i vazhdueshëm. Mateo Henri ka thënë: "Gëzimi i hipokritit zgjat vetëm për një moment, por gëzimi i atyre, që qëndrojnë në dashurinë e Perëndisë, i përngjan një feste, që s'ka fund". Jezusi tha që ky gëzim "qëndron" brenda nesh, d.m.th. ai i reziston edhe situatave më të vështira, që mund të kalojmë, ngaqë e ka themelin tek një Person, jo tek ngjarjet, që ndodhin. "Kështu edhe ju tani jeni në dhembje, por unë do t’ju shoh përsëri dhe zemra juaj do të gëzohet, dhe askush nuk do t’ua heqë gëzimin tuaj" (Gjoni 16:22)... "Ta konsideroni një gëzim të madh, o vëllezër të mi, kur ndodheni përballë sprovash nga më të ndryshmet" (Jakobi 1:2)... "Aty nga mesnata Pali dhe Sila po luteshin dhe i këndonin himne Perëndisë; dhe të burgosurit i dëgjonin" (Veprat e Apostujve 16:25). Është gëzimi i Krishtit brenda nesh, që na jep fitoren në çdo situatë. "Gëzimi i Zotit është fuqia juaj" (Nehemia 8:10).

Sekreti i gëzimit

Po kur nuk e ndjemë atë "gëzim, gëzim, gëzim, gëzim në shpirtin tim", siç thotë kënga? Mos, vallë, Krishti nuk na ka dhënë një gëzim të plotë e të përsosur? Mos, vallë, ka diçka brenda nesh, që e pengon gëzimin e Tij që të jetë i plotë?

Sekreti i gëzimit fillon atëherë, kur ia dorëzojmë jetën Zotit. "Kthemë gëzimin e shpëtimit" (Psalmi 51:12)... "Atëherë shpirti im do të ngazëllejë tek Zoti dhe do të gëzohet për shpëtimin e tij" (Psalmi 35:9). Një dorëzim i tillë nuk do të thotë thjesht t'i kërkosh Atij, që të të shpëtojë prej mëkatit, por gjithashtu që ta lejosh Atë, që, nëpërmjet Frymës së Shenjtë, të të udhëheqë në çdo hap, që hedh. "Dhe ju u bëtë imituesit tanë dhe të Zotit, duke e pranuar fjalën në mes të një pikëllimi të madh, me gëzimin e Frymës së Shenjtë" (1 Thesalonikasve 1:6). Një gëzim i tillë është një nga karakteristikat e pranisë së Frymës së Shenjtë në jetën tonë (shiko Galatasve 5:22). Ndoshta, po të kthehemi përsëri tek "dashuria e parë" (Zbulesa 2:4), do ta kuptojmë vërtet gëzimin e shpëtimit e do të rifreskohemi shpirtërisht. "Ju do të merrni me gëzim ujin nga burimet e shpëtimit" (Isaia 12:3). 

Sekreti i gëzimit përfshin edhe të studjuarit nga ana jonë e fjalës së Perëndisë. "Dhe po ju shkruajmë këto gjëra që gëzimi juaj të jetë i plotë" (1 Gjonit 1:4). Vargu në hyrje të këtij studimi thotë: "Këto gjëra jua kam thënë që gëzimi im të qëndrojë në ju dhe gëzimi juaj të jetë i plotë". Mungesa e të studjuarit të Biblës është një nga arsyet pse ca të krishterë janë të mërzitur e pa jetë.

Sekreti i gëzimit njihet prej atyre, që gjejnë kohë për t'iu lutur Perëndisë. "Kërkoni dhe do të merrni, që gëzimi juaj të jetë i plotë" (Gjoni 16:24)... "Ti do të më tregosh shtegun e jetës; ka shumë gëzim në praninë tënde; në të djathtën tënde ka kënaqësi në përjetësi" (Psalmi 16:11).   

Përfundim

© 16/3/2009