Mos e humb kurajon!

"Mos ki frikë, sepse unë jam me ty, mos e humb, sepse unë jam Perëndia yt. Unë të forcoj dhe njëkohësisht të ndihmoj dhe të mbaj me dorën e djathtë të drejtësisë sime" (Isaia 41:10).

Parathënie

Jeta e krishterë nuk është e lehtë. Ajo është akoma më e vështirë për ata, që vuajnë e persekutohen në vende të ndryshme të botës. Por Perëndia na premton se do të na japë fuqinë e nevojshme, për t'i qëndruar besnik Atij e për të mos u lëkundur në besim. Nëse kemi për të përjetuar një kurajo të tillë, atëherë, në fillim, duhet ta hedhim poshtë çdo lloj frike, meraku, apo shqetësimi dhe ta lejojmë Zotin, që të na drejtojë drejt fitores. Por, si do të arrijmë t'i besojmë Perëndisë, pa patur aspak frikë?

Perëndia është me ne

Do të bënim mirë, që të mos i harronim ato raste, kur Perëndia na ka çliruar prej situatash të pamundura. Në raste të tilla, jemi përpjekur aq shumë për të gjetur vetë një rrugëdalje, por pa rezultat. Përkundrazi, kemi mbetur të zhgënjyer, të dëshpëruar, të frikësuar e të shqetësuar. Ndoshta i kërkuam dikujt ndihmë apo këshillë, por e pamë se as ata nuk dinin ç'përgjigje të na jepnin. Atëherë na u kujtua se Perëndia ishte akoma me ne. Nuk na kishte braktisur e nuk na kishte lënë për t'u fundosur në llumin e dëshpërimit, por na kishte zgjatur dorën për të na shpëtuar. "Unë kam pritur me ngulm dhe me durim Zotin, dhe ai u përkul mbi mua dhe dëgjoi britmën time. Më nxorri jashtë një grope shkatërrimi, nga balta e moçalit, i vendosi këmbët e mia mbi një shkëmb dhe i ka bërë të qëndrueshme hapat e mia. Ai vuri në gojën time një kantik të ri për të lëvduar Perëndinë tonë; shumë njerëz kanë për ta parë këtë, do të dridhen dhe do t’i besojnë Zotit" (Psalmi 40:1-3)... "Nuk do të të lë, nuk do të të braktis” (Hebrenjve 13:5). Kur e dimë se Ai është me ne në çdo hap të jetës, marrim kurajo për të vazhduar rrugën me Të. "Por megjithatë unë jam gjithnjë me ty; ti më ke kapur nga dora e djathtë" (Psalmi 73:23).

Besimi

Ndoshta nevrikosemi, kur i drejtohemi dikujt për ndihmë e ata na thonë: “Kini besimin e Perëndisë!" (Marku 11:22). Por, një besim i tillë është pikërisht ajo, që na nevojitet në jetën tonë të krishterë. Kushdo që ecën "nëpërmjet besimit dhe jo nëpërmjet vizionit" (2 Korintasve 5:7), gjen siguri në dorën e drejtësisë së Perëndisë. Një problem i caktuar mund të na duket i vështirë apo i pamundur për t'u zgjidhur, por të mos harrojmë se ndjekim Perëndinë e Gjithëpushtetshëm të Qiellit: "Ja, unë jam Zoti, Perëndia i çdo mishi; a ka vallë ndonjë gjë tepër të vështirë për mua?" (Jeremia 32:27)... “Për njerëzit kjo është e pamundur, por për Perëndinë çdo gjë është e mundur” (Mateu 19:26)... "Sepse me Perëndinë asgjë s’është e pamundshme” (Luka 1:37).

Perëndia nuk na braktis, atëherë kur na mungon besimi tek Ai. Por, në një farë mënyre, mosbesimi ynë bëhet pengesë për kryerjen e punës së Tij në jetën tonë. "Dhe, për shkak të mosbesimit të tyre, ai nuk bëri aty shumë vepra të pushtetshme” (Mateu 13:58)... "Edhe pa besim është e pamundur t’i pëlqesh Atij, sepse ai që i afrohet Perëndisë duhet të besojë se Perëndia është, dhe se është shpërblenjësi i atyre që e kërkojnë atë" (Hebrenjve 11:6).

Fitorja

"Duke qënë i bindur për këtë, se ai që nisi një punë të mirë në ju, do ta përfundojë deri në ditën e Jezu Krishtit" (Filipianëve 1:6). Fitorja nuk mund të arrihet nëpërmejt forcës apo arsyetimit njerëzor. Fuqia jonë është në fakt fuqia e Perëndisë, që vepron në ne e nëpërmjet nesh. Ai na jep fitoren, në momentin kur e pranojmë se Ai është i gjithëfuqishëm. "Por ta falënderojmë Perëndinë që na jep fitoren me anë të Zotit tonë Jezu Krisht" (1 Korintasve 15:57). Kur kemi një siguri e garanci të tillë në zemër, fitoren e kemi korrur me kohë. "Por në të gjitha këto gjëra ne jemi më shumë se fitimtarë për hir të atij që na deshi" (Romakëve 8:37)... "Por, falem nderit Perëndisë, që na bën të ngadhnjejmë gjithnjë në Krishtin dhe shfaq kudo nëpërmjet nesh erën e këndshme të njohurisë së vet" (2 Korintasve 2:14).   

Përfundim

© 4/4/2009