Në fillim (pjesa 1)

"Në fillim Perëndia krijoi qiejt dhe tokën" (Zanafilla 1:1) .

Parathënie

Sot, doktrina e çmuar e krijimit të botës po sulmohet nga të gjitha anët. Por, Perëndia dhe kisha e vërtetë e Tij vazhdojnë akoma ta shpallin atë si të vërtetë absolute. Madje edhe libri i fundit i Biblës na mëson se të gjitha gjërat u krijuan për kënaqësinë e Perëndisë. "Ti je i denjë, o Zot, të marrësh lavdinë, nderimin dhe fuqinë, sepse ti i krijove të gjitha gjëra, dhe nëpërmjet vullnetit tënd ekzistojnë dhe u krijuan” (Zbulesa 4:11). Historia e krijimit të botës është një e vërtetë absolute, e cila na jep mësim rreth vetë Perëndisë. "I gjithë Shkrimi është i frymëzuar nga Perëndia dhe i dobishëm për mësim, bindje, ndreqje dhe për edukim me drejtësi" (2 Timoteut 3:16)... "Qiejtë tregojnë lavdinë e Perëndisë dhe kupa qiellore shpall veprën e duarve të tij" (Psalmi 19:1). Po qe se një themel i tillë i krijimit do të shëmbej, atëherë e gjithë Bibla do të thërrmohej e do të bëhej mith e fantazi, apo me fjalë të tjera, gënjeshtër fetare.

Ç'mësoi kisha e hershme?

"O Zot, ti je Perëndia që ke bërë qiellin, tokën, detin dhe gjithçka që është në ta" (Veprat e Apostujve 4:24)... "Perëndia që bëri botën dhe të gjitha gjërat që janë në të" (Veprat e Apostujve 17:24). Pasuesit e parë të Krishtit nuk mund të bënin dot gjë tjetër, veçse t'iu besonin të gjitha atyre mësimeve, që iu kishte dhënë vetë Ai dhe t'iua mësonin ato të tjerëve. Jezusi nuk tha asnjëherë se Moisiu e kishte patur gabim, lidhur me origjinën e njeriut në tokë. Ai nuk e zuri aspak në gojë qoftë teorinë e evolucionit, qoftë ndonjë teori tjetër. Përkundrazi, Ai mësoi se Ati i Tij kishte krijuar universin. "Në atë kohë Jezusi nisi të thotë: “Unë të lavdëroj, o Atë, Zot i qiellit dhe i dheut, sepse ua fshehe këto gjëra të urtit dhe të mençurit, dhe ua zbulove fëmijëve të vegjël. Po, o Atë, sepse kështu të pëlqeu ty. Çdo gjë më është dhënë në dorë nga Ati im, dhe asnjëri nuk e njeh Birin, përveç Atit; dhe asnjëri nuk e njeh Atin, përveç Birit dhe atij të cilit Biri don t’ia zbulojë" (Mateu 11:25-27).

Për këtë arsye, edhe apostulli Gjon e hap ungjillin e tij me këto fjalë: "Në fillim ishte Fjala dhe Fjala ishte pranë Perëndisë, dhe Fjala ishte Perëndi. Ai (fjala) ishte në fillim me Perëndinë. Të gjitha gjërat u bënë me anë të tij (fjala), dhe pa atë nuk u bë asnjë nga ato që u bënë" (Gjoni 1:1-3). Prandaj, pra, Jezusi duhet ta dijë mirë se nga erdhi universi, jo prej një shpërthimi të madh mitologjik, por prej fjalës së folur të Perëndisë. Fjala e Jezusit është e besueshme, ngaqë Ai ishte atje Vetë me Atin dhe Frymën e Shenjtë, tek u dha urdhëri, që gjithçka të egzistonte prej asgjëje. "Sepse në të u krijuan të gjitha gjërat, ato që janë në qiejt dhe ato mbi dhe, gjërat që duken dhe ato që nuk duken" (Kolosianëve 1:16)... "Me anë të besimit ne kuptojmë se bota është ndërtuar me fjalën e Perëndisë, sa që ato që shihen nuk u bënë prej gjërave që shihen" (Hebrenjve 11:3).

Shpërthimi i madh (i teorisë së evolucionit) është thjesht një gënjeshtër e madhe

Sot, të paktë janë ata, që besojnë në atë, që thotë Bibla për krijimin e botës. Madje edhe ata të ashtu-quajturit 'të krishterë', e kanë gëlltitur karremin e djallit dhe ia kanë mohuar shpirtit jetën e përjetshme. Njerëz të tillë kanë besuar gënjeshtrën më të madhe të epokës, ngaqë nuk i kanë qëndruar besnik të vërtetës. "Dhe nga çdo mashtrim ligësie për ata që humbin, sepse nuk pranuan ta duan të vërtetën për të qenë të shpëtuar. E prandaj Perëndia do t’u dërgojë atyre një gënjim që do t’i bëjë të gabojnë, që t’i besojnë gënjeshtrës, që të dënohen të gjithë ata që nuk i besuan së vërtetës, por përqafuan ligësinë!" (2 Thesalonikasve 2:10-12).

Teoria e evolucionit ka qenë një nga drapenjtë më të mëdhenj, që ka përdorur Satanai, për të korrur të humburit drejt mallkimit të përjetshëm. Pasuesit e tij, humanistët, e kanë qejf shumë këtë teori, sepse, nëpërmjet figurave të famshme të medias, ata deklarojnë se një teori e tillë është fakt, në një kohë që s'është aspak fakt. Ata të krishterë, që i besojnë një teorie të tillë, e kanë hedhur poshtë fjalën e Perëndisë, që nuk gënjen. "Në shpresën e jetës së përjetshme, të cilën Perëndia, që nuk gënjen, e premtoi para të gjitha kohërave" (Titit 1:2). Është për t'u habitur që njerëz të tillë e quajnë Perëndinë 'gënjeshtar', duke deklaruar, në të njëjtën kohë, se njeriu mëkatar thotë të vërtetën. Teoria e evolucionit ka pësuar ndryshime, nga shekulli në shekull, ngaqë ide të reja i kanë hedhur poshtë konceptet e përkufizuara më parë. Por, e vërteta e krijimit të botës nuk ka ndryshuar kurrë, që nga koha kur Perëndia ia shfaqi atë etërve të parë. "Çdo gjë e mirë që na jepet dhe çdo dhuratë e përsosur vjen prej së larti dhe zbret nga Ati i dritave, pranë së cilit nuk ka ndërrim dhe as hije ndryshimi" (Jakobi 1:17)... "Unë jam Zoti, nuk ndryshoj" (Malakia 3:6)... "Krishti është i njëjtë dje, sot e përjetë" (Hebrenjve 13:8).

Beso tek Perëndia!

Njeriut i ndryshon gjithmonë mendja. Prandaj, pra, është më mirë që t'i besosh Atij, që nuk ndryshon kurrë. Vetëm në këtë mënyrë, as nuk do të ngatërrohemi, as nuk do të mashtrohemi, as nuk do të humbim kurrë. "Është më mirë të gjesh strehë tek Zoti se sa t’i kesh besim njeriut. Është më mirë të gjesh strehë tek Zoti se sa t’u kesh besim princave" (Psalmi 118:8-9). Sistemi i besimit, që propagandohet në media, ka si synim ta shkatërrojë besimin e njerëzve të Perëndisë. Bota mundohet të na bëjë të dukemi si budallenj. Por, budallai më i madh është ai, që beson në teorinë e evolucionit, ngaqë nuk arrin dot ta kuptojë madje edhe atë, që e kupton edhe një fëmijë besimtar. "Dhe njeriu natyror nuk i rrok gjërat që janë të Frymës së Shenjtë; sepse për të janë marrëzi dhe nuk mund t’i njohë; sepse ato gjykohen frymërisht" (1 Korintasve 2:14). Mateo Henri ka thënë: "Vargu i parë i Biblës na paraqet një dëshmi të bindshme dhe të nevojshme të origjinës së tokës dhe të qiellit. Besimi i të krishterëve të përulur e kupton këtë më mirë sesa mendja e madhe e të shkolluarve".

Nuk është e mundur të gjendet një kompromis midis krijimit dhe evolucionit, sepse një kompromis i tillë nuk përfundon asnjëherë në favor të fjalës së zbuluar të Perëndisë, por në favor të evolucionit.     

Përfundim

E shohim, pra, se një pasues i vërtetë i Krishtit duhet të besojë në Atë, që krijoi gjithçka. "Sepse prej tij, me anë të tij dhe për të janë të gjitha gjëra. Lavdi atij përjetë!" (Romakëve 11:36). Në pjesën e dytë të këtij studimi, do të shohim se ç'na thotë Bibla rreth Atij, që përmendet në vargun e parë të Zanafillës.   

© 7/2/2009