Në fillim (pjesa 2)

"Në fillim Perëndia krijoi qiejt dhe tokën" (Zanafilla 1:1).

Parathënie

Perëndia Atë, Perëndia Bir dhe Perëndia Frymë e Shenjtë (Triniteti) krijoi gjithçka, që e shohim e që nuk e shohim. Po nuk e pranuam këtë fakt si të vërtetë absolute, nuk mund ta njohim dot personalisht as Perëndinë. Ka shumë që thonë se e njohin Krishtin si Shpëtimtarin e tyre personal, por, në të njëjtën kohë, besojnë se gjithçka natyrore ka ardhur si rezultat i një evolucioni prej miliona vjetësh, e nuk është vepër shtatë-ditore e Perëndisë. Njerëz të tillë nuk kanë asnjë lloj marrëdhënieje me Perëndinë e nuk janë të shpëtuar.

Kush është Perëndia?

Perëndia na thotë se kush është Ai tek Eksodi 3:13-14, "Atëherë Moisiu i tha Perëndisë: "Ja, kur të shkoj te bijtë e Izraelit dhe t’u them: "Perëndia i etërve tuaj më ka dërguar te ju," po të jetë se ata më thonë: "Cili është emri i tij?," ç’përgjigje duhet t’u jap?". Perëndia i tha Moisiut: "UNË JAM AI QË JAM". Pastaj tha: "Do t’u thuash kështu bijve të Izraelit: "UNË JAM-i më ka dërguar tek ju"". Perëndia ka egzistuar përjetësisht. Ai nuk ka as fillim, as mbarim. "Kujtoni gjërat e kaluara të kohëve shumë të vjetra, sepse unë jam Perëndia dhe nuk ka asnjë tjetër; jam Perëndia dhe askush nuk më ngjet mua, që shpall fundin që në fillim, dhe shumë kohë më parë gjërat që ende nuk janë bërë, duke thënë: "Plani im do të realizohet dhe do të bëj gjithçka më pëlqen" (Isaia 46:9-10)... "Që, në kohën e caktuar, do ta tregojë i lumi e i vetmi sundimtar, Mbreti i mbretërve dhe Zot i zotërve, ai që i vetmi e ka pavdekësinë dhe rri në dritë të paafrueshme, të cilën asnjë njeri nuk e ka parë kurrë dhe as mund ta shohë; atij i qoftë nderi dhe pushteti i përjetshëm" (1 Timoteut 6:15-16).

Emri 'Jehova' shpreh faktin se Perëndia është i vetë-egzistueshëm (d.m.th. egziston pa patur nevojën e askujt) dhe i përjetshëm nga natyra. Asnjëri prej të ashtu-quajturve 'libra të shenjtë' të feve të botës nuk na e vë në dukje faktin se Perëndia dhe vetëm Perëndia është Ai, që e krijoi universin. Vetëm Bibla na e shfaq se kush është Perëndia, duke na dhënë vetë krijimin e botës si dëshmi të Perëndisë. "Në fakt cilësitë e tij të padukshme, fuqia e tij e përjetshme dhe hyjnia e tij, duke qenë të dukshme nëpërmjet veprave të tij që nga krijimi i botës, shihen qartë, me qëllim që ata të jenë të pafalshëm" (Romakëve 1:20). Vetëm dikush, që ka paragjykime, është gati ta mohojë faktin e egzistencës së Krijuesit dhe Dezenjatorit hyjnor. "Sepse, megjithëse e njohën Perëndinë, nuk e përlëvduan as e falënderuan si Perëndi, përkundrazi u bënë të pamend në arsyetimet e tyre dhe zemra e tyre pa gjykim u errësua. Duke e deklaruar veten të urtë, u bënë të marrë" (Romakëve 1:21-22).

Veprat e Perëndisë

Kapitulli i parë i Zanafillës na tregon se Perëndia krijoi kohën, hapësirën dhe lëndën - prej asgjëje. Gjithçka në univers erdhi direkt prej Tij. Ai është origjina e gjithçkaje, sepse asgjë nuk egzistoi përpara se të egzistonte Perëndia. “Unë jam Alfa dhe Omega, fillimi dhe mbarimi”, thotë Zoti “që është dhe që ishte dhe që vjen, i Plotfuqishmi” (Zbulesa 1:8). Ai bëri gjithçka sipas mençurisë së Tij, prandaj edhe nuk kishte nevojë që ta drejtonte dikush tjetër, apo që t'i thoshin se si të vepronte. "Ai bëri tokën me fuqinë e tij, ka vendosur botën me diturinë e tij dhe ka shpalosur qiejt me zgjuarsinë e tij" (Jeremia 10:12).

Veprat e Perëndisë janë thjesht fjala e Tij e folur. Ai e krijoi tokën dhe gjithçka në të, nëpërmjet fjalës së Tij. Zanafilla 1:2 na thotë: "Fryma e Perëndisë fluturonte mbi sipërfaqen e ujërave". Prandaj edhe autori i psalmit 33 shkruan kështu: "Qiejtë u bënë me anë të fjalës së Zotit dhe tërë ushtria e tyre me anë të frymës së gojës së tij" (Psalmi 33:6). Vetëm Ai kishte fuqinë për të krijuar gjithçka. Prandaj, pra, të thuash se një proçes evolucionar është forca shtytëse e krijimit, është njëlloj sikurse t'ia vjedhësh Perëndisë lavdinë dhe nderin. "Qiejtë tregojnë lavdinë e Perëndisë dhe kupa qiellore shpall veprën e duarve të tij" (Psalmi 19:1).

Teoria e njerëzve

Ka nga ata, që besojnë si tek teoria e evolucionit, ashtu edhe tek Perëndia. Por, nëse njerëz të tillë kanë të drejtën me vete, atëherë, a s'është për të të ardhur keq që Perëndisë iu desh të priste derisa Çarls Darvini ta formulonte idenë e tij të evolucionit, me qëllim që ne ta mësonim të vërtetën?! Sa gabim e paska patur Jezus Krishti, atëherë, ngaqë nuk na mësoi atë, që besonte Darvini! "Perëndia, mbasi u foli së lashti shumë herë dhe në shumë mënyra etërve me anë të profetëve, së fundi, këto ditë na ka folur me anë të Birit, të cilin e bëri trashëgimtar të të gjitha gjërave, me anë të të cilit e krijoi dhe gjithësinë" (Hebrenjve 1:1-2). Po qe se Jezusi e paska patur gabim, lidhur me krijimin e botës, atëherë më mirë të shkojmë e të gjejmë një Shpëtimtar tjetër!

A ishte atje Darvini, kur filloi të egzistonte universi? Nëse përgjigja është 'jo', atëherë a është e saktë teoria e tij? "Ku ishe kur unë hidhja themelet e tokës? Thuaje, në rast se ke aq zgjuarsi" (Jobit 38:4). A mund ta shpjegojë dot Darvini faktin se si toka qëndron pezull në mes të hapësirës qiellore, duke mos u varur fare në asgjë, e megjithatë, ky planet është habitat i përsosur për jetën? "Ai shtrin veriun në zbrazëti dhe e mban tokën pezull mbi hiçin" (Jobit 26:7). Një teori, që shpiket për t'ia zënë vendin fakteve, dëshmon se njerëzit kërkojnë ta hedhin poshtë Perëndinë me vetëdashje. "Duke qenë se mendimet e mia nuk janë mendimet tuaja, dhe as rrugët tuaja nuk janë rrugët e mia," thotë Zoti. "Ashtu si qiejtë janë më të lartë se toka, kështu edhe rrugët e mia janë më të larta se rrugët tuaja dhe mendimet e mia janë më të larta se mendimet tuaja" (Isaia 55:8-9).

Përfundim

Perëndia është Krijuesi i gjithçkaje. "Perëndia i përjetësisë, Zoti, krijuesi i kufijve të tokës" (Isaia 40:28). Nuk do të egzistonte, po të mos ishte i tillë, sepse nuk ka vend për një Perëndi, që nuk është Origjina e gjithçkaje. Po qe se kapitujt e parë të Biblës janë mith, atëherë e tërë Bibla është mith. Nuk ia vlen fare ta lexosh! Por, vetë krijimi i botës na flet për egzistencën e Perëndisë, prandaj edhe vetëm një budalla kokëfortë beson në evolucion. "I pamendi ka thënë në zemër të tij: "Nuk ka Perëndi" (Psalmi 14:1).

Në pjesën e ardhshme të këtij studimi, do të zbulojmë arsyen e vërtetë se përse njerëzit e hedhin poshtë atë, që thotë Bibla rreth Krijimit.