Partnerë në lutje

"Të gjithë këta ngulmonin me një mendje të vetme në lutje dhe përgjërim së bashku me gratë, me Marinë, nënën e Jezusit, dhe me vëllezërit e tij" (Veprat e Apostujve 1:14).

Parathënie

Po të ishte e mundur ta kthenim kohën mbrapsht e të jetonim në kohët biblike, kë do të zgjidhnim si partnerë në lutje? Kainin apo Abelin? Abrahamin apo Lotin? Samuelin apo Elinë? Barnabanë apo Ananian dhe Safirën? Po sikur të na jepej rasti për t'u lutur me një turmë besimtarësh, do të luteshim me turmën, apo vetëm me dy a tre veta? Për Perëndinë, ka shumë rëndësi se me kë lutemi dhe se kujt i kërkojmë që të lutet për ne.

Turma

Apostulli Pal ia dinte mirë vlerën lutjes, që bëhej për hir të tij. Është inkurajim i vërtetë ta dish se dikush lutet për ty. Dhe kur Zoti i përgjigjet lutjes, atëherë të dyja palët kënaqen. "Me ndihmën tuaj me anë të lutjeve për ne, që shumë njerëz të falënderojnë për dhuntinë e hirit që do të na jepet me anë të lutjeve të shumë njerëzve" (2 Korintasve 1:11). A duhet t'iu themi shumë njerëzve që të luten për ne, apo vetëm disave? Ka nga ata, që kujtojnë se Perëndia do t'iu përgjigjet më shpejt lutjeve, nëse iu themi shumë vetave, që të luten për një çështje të caktuar. Por kjo nuk vihet re kurrë në Bibël. Perëndia vepron me një ose dy veta, që luten besnikërisht për kombin e tyre, ose që luten për një çështje të caktuar. Në fakt, tek Mateu 6:6, Jezusi na thotë që të mos grumbullojmë shumë njerëz së bashku, kur lutemi: "Por ti, kur lutesh, futu në dhomëzën tënde, mbylle derën dhe lutju Atit tënd në fshehtësi; dhe Ati yt, që shikon në fshehtësi, do të ta shpërblejë publikisht". Zoti na tregon se kush do të marrë përgjigje ndaj lutjeve të veta: "Po ju them gjithashtu se, në qoftë se dy prej jush bien në ujdi mbi tokë të kërkojnë çfarëdo gjëje, kjo do t’u jepet atyre nga Ati im që është në qiej" (Mateu 18:19). Nuk është gabim, që një turmë të krishterësh të mblidhen për t'u lutur së bashku. Por është gabim, kur ata kujtojnë se Perëndisë i bën përshtypje një numër i madh besimtarësh dhe, si rezultat, Ai duhet medoemos që t'iu japë përgjigje lutjeve të tyre.

Kë duhet të zgjedhim?

Mund të kemi një numër të madh miqsh të krishterë, por a është e thënë, që t'iu kërkojmë të gjithëve, që të luten me ne, ose për ne? Apostulli Pal iu kërkoi të gjitha kishave që të luteshin për të, me përjashtim të dy prej tyre. Këto të dyja ishin kisha e Galatasve dhe ajo e Korintasve. Ai nuk i tha kishës së Galatasve, që të lutej për të, ngaqë kjo kishë e kishte braktisur Ungjillin e vërtetë dhe e kishte zëvendësuar atë me doktrinën e rreme, që thoshte se veprat e bamirësisë të sillnin shpëtimin. "O Galatas të marrë! Kush ju ka yshtur që të mos i bindeni së vërtetës, ju, që para syve tuaj Jezu Krishti është përshkruar i kryqëzuar midis jush? Vetëm këtë dua të di nga ju: a e morët Frymën me anë të veprave të ligjit apo nëpërmjet dëgjimit të besimit? A jeni kaq të marrë sa që, mbasi nisët në Frymë, të përfundoni në mish?" (Galatasve 3:1-3). Pali nuk i tha as kishës së Korintit, që të lutej për të, ngaqë ata ishin të zhytur në mëkate: "Tani po gëzohem, jo sepse u trishtuat, por sepse u trishtuat për pendim, sepse u trishtuat sipas Perëndisë, që të mos ju bëhet juve ndonjë dëm nga ne. Trishtimi sipas Perëndisë në fakt, sjell pendim për shpëtim, për të cilin njeriu nuk i vjen keq, por trishtimi i botës shkakton vdekje. Në fakt, ja sa kujdes shkaktoi te ju pikëllimi sipas Perëndisë, madje sa fjalë për të kërkuar ndjesë, sa zemëratë, sa druajtje, sa dëshirë të zjarrtë, sa zell, sa kënaqësi! Me çdo mënyrë ju e treguat se jeni të pastër në këtë çështje" (2 Korintasve 7:9-11). Anëtarët e kësaj kishe mund të luteshin për Palin e ta ndihmonin atë, vetëm pasi të pendoheshin.

Duhet të tregojmë kujdes se kë zgjedhim si partnerë në lutje, ngaqë Perëndia nuk iu përgjigjet lutjeve të çdo njeriu. Ai i hedh poshtë lutjet e atyre:

1) jeta e të cilëve është mëkatare: "Kur i shtrini duart tuaja, unë i fsheh sytë e mi nga ju; edhe kur i shumoni lutjet tuaja, unë nuk dëgjoj; duart tuaja janë tërë gjak...Por paudhësitë tuaja kanë shkaktuar një ndarje midis jush dhe Perëndisë tuaj, dhe mëkatet tuaja kanë bërë të fshihet fytyra e tij prej jush, që të mos ju dëgjojë më" (Isaia 1:15, 59:2);

2) që i trajtojnë keq të tjerët: "Atëherë do t’i këlthasin Zotit, por ai nuk do t’u përgjigjet; në atë kohë ai do t’ua fshehë fytyrën e tij, sepse kanë qenë të këqij në veprimet e tyre" (Mikaia 3:4);

3) që nuk pranojnë t'i binden fjalës së Tij: "Dhe ndodhi që, mbasi ai thërriste dhe ata nuk ia vinin veshin, ata thirrën dhe unë nuk ua vura veshin," thotë Zoti i ushtrive" (Zakaria 7:13);

4) që bëjnë lutje egoiste: "Ju kërkoni dhe nuk merrni, sepse kërkoni keqas që të shpenzoni për kënaqësitë tuaja" (Jakobi 4:3);

5) që luten në mënyrë fetare: "Por kur ju luteni, mos përdorni përsëritje të kota siç bëjnë paganët, sepse ata mendojnë se do t’u plotësohet lutja se kanë përdorur shumë fjalë" (Mateu 6:7).

Përfundim

© 4/7/2009