Si e hap zemrën Perëndia

“Dhe një grua, me emër Lidia, që ishte tregtare të purpurtash, nga qyteti i Tiatirës dhe që e adhuronte Perëndinë, po dëgjonte. Dhe Zoti ia hapi zemrën për të dëgjuar gjërat që thoshte Pali. Pasi ajo u pagëzua me familjen e saj, na u lut duke thënë: “Në qoftë se më keni gjykuar se jam besnike ndaj Zotit, hyni në shtëpinë time dhe rrini”. Dhe na detyroi të pranojmë” (Veprat e Apostujve 16:14-15).

Parathënie

Lidia jetonte në një qytet të zhytur thellë në fenë pagane dhe në idhujtari. Ajo dukej që ishte një grua e pasur, ngaqë boja e purpurt (e cila merrej prej një lloj peshku) ishte shumë e shtrenjtë. Edhe pse Lidia e “adhuronte Perëndinë” ( ndoshta sipas zakonit të judenjve), ajo nuk ishte e shpëtuar. I shkonte pas zakoneve fetare, por zemra e saj nuk ishte e hapur akoma ndaj Ungjillit, sepse deri në atë moment, askush nuk i kishte folur asaj rreth së vërtetës. Fjalët e Palit depërtuan thellë në zemrën e saj dhe e bënë të lirë.

Thelbi i çështjes 

Në tekstin tonë të mësipërm, fjala “zemër” i referohet mendjes apo intelektit. Kjo do të thotë se Lidia i bluajti në mendjen e saj të gjitha ato gjëra që kishte dëgjuar. Nuk ishin emocionet, por mendja e saj ajo që u ndriçua nga drita hyjnore. Çarls Ryrie shkruan: “Zemra është kolltuku i vullnetit dhe i jetës intelektuale, emocionale, dhe shpirtërore të njeriut” (Bibla Studiuese e Ryrie-it, botimi i zgjeruar, faqja 1975).

Ka shumë pasazhe në Bibël, ku fjala “zemër” mund të ketë vetëm kuptimin e fjalës “mendje”:

“Por Jezusi, duke njohur mendimet e tyre, tha: “Pse mendoni gjëra të mbrapështa në zemrat tuaja?” (Mateu 9:4).

“Sepse zemra e këtij populli është bërë e pandjeshme, ata janë bërë të rëndë nga veshët dhe kanë mbyllur sytë, që nuk shohin me sy dhe nuk dëgjojnë me vesh, dhe nuk gjykojnë me zemër dhe nuk kthehen, dhe unë t’i shëroj” (Mateu 13:15).

“Sepse fjala e Perëndisë është e gjallë dhe vepruese, më e mprehtë se çdo shpatë me dy tehe dhe depërton deri në ndarjen e shpirtit dhe të frymës, të nyjeve dhe të palcave, dhe është në gjendje të gjykojë mendimet dhe dëshirat e zemrës” (Hebrenjve 4:12).

Besimi i vërtetë buron nga mendja, e cila është e hapur nga Fryma e Perëndisë, sepse besimi mbështetet tek të vërtetat absolute dhe jo tek ndjenjat: “Sepse me zemër, njeriu beson në drejtësi dhe me gojë bëhet rrëfim për shpëtim” (Romakëve 10:10)… “Sepse ecim nëpërmjet besimit dhe jo nëpërmjet vizionit” (2 Korintasve 5:7).

Përqëndrim ndaj Fjalës së Perëndisë

Lidia e kishte të përqëndruar vëmendjen tek predikimi i Palit. Ajo, jo vetëm që besoi, por e vuri në praktikë besimin e saj të ri, duke u pagëzuar si një besimtare dhe duke i inkurajuar të tjerët të vepronin në të njëjtën mënyrë si ajo. Fryma e Shenjtë i hap zemrat vetëm nëpërmjet fjalës së Perëndisë. Njeriu gjen shpëtimin, vetëm atëherë kur ai/ajo e kupton dhe e pranon të vërtetën. Për këtë gjë bën fjalë edhe Pali tek Efesianëve 1:18: “Dhe t’u ndriçojë sytë e mendjes suaj, që të dini cila është shpresa e thirrjes së tij dhe cilat janë pasuritë e lavdisë së trashëgimisë së tij në shenjtorët”. Në komentimin që i ka bërë këtij vargu, Xhon Ueslli ka shkruar kështu: “Këto (d.m.th. sytë e mendjes) janë të mbyllura nga vetë natyra njerëzore. Është vetëm vepra e çuditshme e Perëndisë ajo që i bën ato të hapen” (Shënime mbi Dhiatën e Re).

E vërteta e zhduk (e mënjanon) gjithçka që e mban mëkatarin të larguar nga Perëndia. Nuk ka themel tjetër shpëtimi përveç këtij. Për të siguruar shpëtimin, nuk mjafton vetëm që të zbatosh ritet fetare dhe ta adhurosh Perëndinë. “Me anë të urdhërimeve të tua unë përfitoj zgjuarësinë; prandaj urrej çdo shteg falsiteti. Fjala jote është një llambë në këmbën time dhe një dritë në shtegun tim” (Psalmi 119:104-105)… “Zbulimi i fjalëve të tua ndriçon dhe u jep mendje njerëzve të thjeshtë” (Psalmi 119:130)… “Atëherë Jezusi u tha Judenjve që besuan në të: “Nëse do të qëndroni në fjalën time, jeni me të vërtetë dishepujt e mi; do ta njihni të vërtetën dhe e vërteta do t’ju bëjë të lirë” (Gjoni 8:31-32).

Zemrat e mbyllura

Zemrat (mendjet) e shumë njerëzve janë të mbyllura ndaj së vërtetës, edhe pse ata nuk e kuptojnë këtë gjë. Kjo vjen si pasojë e zemrës, që bëhet e ngurtë dhe kokëfortë, por një zemër të mbyllur kanë edhe ata që janë të zhytur në tradita/zakone fetare. Pak rëndësi ka sesa të devotshëm apo sesa afër Perëndisë mendojnë se janë këta njerëz. Është vetë feja e rreme ajo që i mban ata larg prej Ungjillit të Krishtit. Jezusi konsiderohet si skandal për jetën dhe fenë e atyre që nuk janë të shpëtuar. “Si mund të besoni ju, ju që ia merrni lavdinë njëri-tjetrit dhe nuk kërkoni lavdinë që vjen vetëm nga Perëndia?” (Gjoni 5:44)… “Por ne predikojmë Krishtin të kryqëzuar, skandal për Judenjtë dhe marrëzi për Grekët” (1 Korintasve 1:23). Ashtu siç bënte Lidia para se ta pranonte Krishtin, edhe sot shumë vetë i luten Perëndisë, por prapëseprapë ata nuk janë të shpëtuar dhe Perëndia nuk i dëgjon lutjet e tyre. Zemra që është vërtet e dhënë pas Perëndisë, kur prezantohet me fjalën e Tij, pa dyshim, e beson dhe e pranon atë plotësisht.

Përfundim

Zoti i hap zemrat e njerëzve sot pikërisht në të njëjtën mënyrë  dhe me të njëjtat mjete, ashtu siç hapi edhe zemrën e Lidias. Judenjtë nuk mund ta kuptojnë të vërtetën, përsa kohë që e mbajnë të hedhur velin para syve: “Por deri më sot, kur lexohet Moisiu, një vel mbetet mbi zemrat e tyre” (2 Korintasve 3:15). Katolikët, po ashtu, nuk mund të shikojnë përtej traditave apo zakoneve të tyre fetare. Ai që beson tek evolucioni, nuk mund të shohë (apo të kuptojë) asgjë tjetër përveç teorisë së Darvinit. Po qe se këto pengesa nuk do të zhduken, atëherë këta njerëz do të vazhdojnë të ecin në gabim dhe do të përfundojnë të mallkuar. “Që të hedhim poshtë mendimet dhe çdo lartësi që ngrihet kundër njohjes së Perëndisë dhe t’ia nënshtrojmë çdo mendim dëgjesës së Krishtit” (2 Korintasve 10:5)… “Ligji i Zotit është i përsosur, ai e përtërin shpirtin; dëshmia e Zotit është e vërtetë dhe e bën të ditur njeriun e thjeshtë. Porositë e Zotit janë të drejta dhe e gëzojnë zemrën; urdhërimet e Zotit janë te pastra dhe ndriçojnë sytë” (Psalmi 19:7-8). 

BACK

Page created 10 June 2006